مش متخيل اجيب موبايل ب 20 الف جنيه عشان يقعد معايا سنه وبعد كده تيجي الشركه تعلم عليا فتنزلي موبايل اجمد منه و احسن منه وبيتشقلب وبيتعرف عليا من نظره عنيا والكلام الجميل ده كله فأبقي عاوز اغيره عشان حاسس ان موبايلي قدم.
ده غير اني مش متخيل اني ابقي ماشي في شوارع مصر المحروسه ماسك حاجه قيمتها 20 الف جنيه ورايح جاي بيها ..ده الواحد لما بيقبض مرتب الحكومه بيبقي حاسس ان مافيا ايطاليا وموساد اسرائيل مترصدله عشان ياخدهم منه.
وبعدين هيبقي ايه شعوري لو وقع مني وجاب شاشه مثلا وروحت اصلحه قالولي محتاج 10 الاف جنيه عشان تغير الشاشه ؟ او لو واد بموتوسيكل صيني جه شده من علي ودني وجري
لو ابني والموبايل هيقعوا اكيد هجري ع الموبايل الاول الحقه وبعدين اجري اشوف ابني... الموبايل مش هيتجبس بس ابني هيتجبس عادي
مين الناس المهمه اللي هكلمها من عليه ؟ ايه الصفقات اللي ممكن اخلصها بالبروسيسسور الجاحد ده ؟ ليه افتح الموبايل بوشي يعني خلاص ايدي اتقطعت ؟
هستفيد ايه بالكاميرا ال 4k هصور بيها مين يعني ؟ او ايه الاماكن اللي ممكن اصورها هنا؟
وبعدين اهو ده الوحيد اللي ممكن اطلع اللقمه من بقي واديهاله فعلا؟
وبعدين اللي يدفع في موبايل 20 الف لازم يكون مرتبه الشهري قده مرتين تلاته ..لكن انت مصري بتقبض يوم ماتبقي برنس 5 ولا 6 ولا 7 الاف جنيه ...تجيب موبايل بمرتب 4 شهور ليه ؟
من يومين موبايلي ضاع وفضلت ادور عليه ساعتين لحد ما لقيته وكنت متكدر وهو موبايل عادي يعني ...امال لو كان ايفون كان زماني بدور علي الموبايل وانا نصي اليمين مابيتحركش وحد بيزقني علي كرسي بعجل... ووشي كان هيبقي اتعوج واتشل ولو حتي كنت لقيته مكنتش هعرف افتحه بتقنيه ال Face detection الجديده دي.
ياريت يا جماعه مانهتمش بالحاجات اللي العالم بيهتم بيها عشان احنا في وادي وهما في وادي تاني خالص ... احنا في وادي النطرون.
وبعدين اهتمامنا كمصريين بمؤتمر ابل زي بالظبط اهتمام واحد نباتي بطريقه عمل الريش البتلو
يلا كده استهدوا بالله وقوموا اقفلوا الراوتر وافتحوه تاني ..وبعدين ايفون بخط واحد واحنا كمصريين معانا 3 خطوط لكل الشبكات فمش هينفع معانا خالص يعني