أعربت الفنانة مى كساب عن حزنها وآلامها والظروف الموجعة التى تمر بها منذ 6 سنوات.

وكتبت مى، عبر صفحتها الرسمية على فيس بوك، "نفسى تعبانة قوى بقالها 6 سنين، مصدومة ومحتارة ومش عارفة ترسى على بر، مش عارفة تلاقى راحة البال ولا السعادة ولا الرضا، بتدفع تمن أنها حساسة زيادة عن اللزوم، بتدفع تمن التربية والأصول".

وأوضحت مى: "من يوم ما الثورة قامت وأنا مش أنا، كبرت وعجزت وصغرت وعيلت وشيبت مش فاهمة حاجة، تايهة توهة وحشة قوى، مش عارفة ألاقينى خالص، والله العظيم مش لاقيه مى خالص، أنا مش أنا، ابتلاءات كتير والحمد لله، صدمات فى البشر أكتر والحمد لله، حتى الشغل حاسة فيه بكبوة كبيرة جدا، استنزاف واستهلاك مش طبيعى، وبرضه مش باستسلم، بقوى نفسى وأقولها قومى ما تفقديش الأمل فى رحمة ربنا، ما تفقديش الأمل فى بكرة أحلى، ما تفقديش الأمل فى المدينة الفاضلة، ما تفقديش الأمل فى إنك تلاقى مى من جديد، بس للأسف النفاق والوشوش الكذابة اللى شفتها".

وتابعت مى: "وقت الثورة صدمنى قوى موت أمى كسرنى قوى، تدخل الناس فى حياتى وتعليقاتهم غير المهذبة واجعنى قوى، استنزافى فى الشغل واستهلاكى وإحساسى أنى مش عارفة أقدم الفن اللى نفسى أقدمه دابحنى قوى، أزمة جوزى قاتلانى قوى، كل حاجة حواليه قوى قوى قوى، عارفة إن ده أصعب اختبار من رب العالمين، ونفسى أكون أده، بحاول أكون أده، بس تراكمات السنين مبهدلانى قوى".

وأضافت مى: "حاسة إن نفسى محتاجة إعادة هيكلة زى كل حاجة فى بلدنا، يا رب خرجنا من المحنة الكبيرة دى، محمد كان بيدينى طاقة أمل، كان بيصبرنى ودايما يقولى اللى جاى أحلى، هتتولدى من جديد ربنا يرجعك أنت وأحمد بالسلامة، عشان بجد نفسى أتولد من جديد وأفقد الذاكرة وأنسى وجع وتعب السنين دول، بس ما نساش اللى اتعلمته منهم، أنا فى انتظار رحمة وعدل ربنا فى انتظار نفسى فى انتظار موعدى مع السعادة".