قال الإعلامى عمرو أديب، إن ما شهدته مصر من أحداث وأزمات خلال الأيام الماضية وخصوصًا جمعة الأرض، يؤكد أن ما يحدث الآن "هو تعثر.. والسيارة ترجع إلى الخلف"، مؤكدًا أن خطة تعطيل مصر وإبعاد الرئيس عبد الفتاح السيسى من حكم مصر ما زالت مستمرة.

 

وأضاف أديب، خلال تقديمه برنامج "القاهرة اليوم" على قناة "اليوم"، أمس من نيويورك، "فى ناس كتير كانت مهللة ومطبلة قرروا يبيعوا السيسى ويغسلوا إيدهم منه تمامًا"، مفسرًا أن "لسه عندنا الثورة فوبيا، وبعض الناس حسوا إن ما يحدث الآن شبه 25 يناير، وأنه واضح أن الراجل ده مش مكمل، وخافوا وقرروا ينطوا من الأتوبيس".

 

وتابع "فيه معارضين للسيسى على طول ودول عندهم مشكلة معاه وهما أحرار عايزين يمشوه مش عايزينه ينجح فى الانتخابات الجاية عايزين يعملوا انتخابات مبكرة، ده مجتمع ديمقراطى، إنما اليوم أخص بالذكر الناس اللى كانت بتروح الاتحادية، الناس اللى كانت بتروح الرئاسة، ومنهم من قرر أن السيسى يرحل"، موضحًا أسباب تراجع بعضهم أن "منهم اللى خاف، ومنهم من كان متخيل أنه هيبقى قريب أكتر وديه مشكلة السيسى لأنه لم يعطى أحد شئ ولم يقسم التورتة، وهو لم يلعب سياسة حتى الآن ويتحدث من المبادئ والدين، ومنهم من رأى أنه هناك ثورة قادمة".