السادة :السيد السفير/ طاهر فرحات و السيد المستشار/ أحمد رياض و السيد المسشتار/ خالد عبد الرحمن و السيدة سكرتير ثان/ سلوى محمد الموافي نرجوا منكم ترك كراسيكم الوثيرة والعمل على حل مشكلات الجالية المصرية في الكويت بدءً من السجن المركزي ومن فيه بدون أحكام تتبع المصريين المحتجزيين في المخافر وذلك للوقوف على نوعية ما إرتكبوه والمعاملة التي يتلقونها وياريت يكون فيه محاميين للسفارة للوقوف بجانبهم مش الجالية المصرية بالكامل فيه لهم محامي واحد فقط هو محامي القنصلية وياريت تعرف مطالب الجالية وياريت فيه لجنة دائمة هنا في الكويت عشان بطاقة الرقم القومي مش لجنة تيجي كل كذا شهر او سنة وياريت المبلغ الطلوب لإستخراج بطاقة الرقم القومي ميكونش مغالة فيه البطاقة في مصر ب 15 جنية يبقى هنا كمان ما يعادل 15 جنية عشان إحنا هنا مش مليونيرات وانتم عارفين كده كويس ويرجى إعادة النظر في المبلغ المطلوب لتجديد البسبور لأنه أيضاً مغاله فيه وياريت يكون فيه أرقام للسفارة المصرية وحد يرد عليها وتعملوا على نشرها بين الجالية المصرية في الكويت عشان لما يكون هناك غبن يقع عليا اعرف أتصل بسفارتي الحبيبة عشان تعرف تجيبلي حقي ونعرف إن المصري زية زي الأمريكي له كرامة وحد يسأل عنه يا ريت يا سيادة السفير لما يكون هناك إحتفال للجالية المصرية يا ريت يعني الجالية المصرية تعرف فمش معقولة اكثر من 400 ألف يمثلهم ناس محدش يعرفهم غير السفير المصري بس وياريت يا سيادة السفير توصي رجالتك في القنصلية المصرية في الروضة يعاملونا بآدمية شوية وياريت أعرف برنامج سيادتك اليومي في السفارة عشان الناس بس بتتكلم وتقول إن سيادتك بتقبض وطبعاً بتقبض من فلوسنا وما بتعملش حاجه فيا ريت ترد عليهم وعلينا ونعرف راتب سيادتك كام انت والسلك الدبلوماسي اللي معاك وبتعملوا أيه بالظبط كل يوم وما هي آلية معرفة مشاكل المصريين بالكويت وما هي مرجعيتكم لذلك وبعدين عاوين نشوف حضرتك . مش معقولة أشوفك بس على صفحات الجرائد بتقص شريط وبتقابل وبتهني بالأعياد للبلاد عاوزين كده حركة جدعنة من الآخر يا سعادة الباشا حل مشاكلنا لو سمحت والسلام على من إتبع الهدى